Պետական պատվերով և պետական աջակցությամբ հրատարակված գրականություն

Հայաստանը մասնակցեց Գյոտեբորգի գրքի միջազգային փառատոնին

06.11.2015

Հայաստանը մասնակցեց Գյոտեբորգի գրքի միջազգային փառատոնին

Հայաստանը մասնակցեց Գյոտեբորգի գրքի միջազգային փառատոնին

Սեպտեմբերի 24-ին մեկնարկեց Շվեդիայի Գյոտեբորգ քաղաքում անցկացվող գրքի միջազգային փառատոնը, որն ամեն տարի ունենում է հարյուր հազարավոր այցելուներ։

Այս տարի փառատոնում առաջին անգամ ներկայացվեց Հայաստանն` առանձին տաղավարով՝ նվիրված Հայոց ցեղասպանության 100-րդ տարելիցին։ Տաղավարում ներկայացվել են վերջին տարիներին Հայաստանում և, առհասարակ, հայերի մասին հրատարակված գրականությունը՝ Ցեղասպանության թեմայով հայերեն, շվեդերեն, անգլերեն, թուրքերեն և այլ լեզուներով գրականության առանձին ցուցադրությամբ։

Հայկական տաղավարի շրջանակներում սեպտեմբերի 25-ին տեղի ունեցավ «1915թ. Հայոց ցեղասպանությունը. ժամանակակից հեռանկարներ և վերլուծություն» խորագրով սեմինարը։ Ելույթ ունեցան Լյունդի համալսարանի պրոֆեսոր, պատմաբան Կլաս Յորան-Կարլսոնը, ով հեղինակել է Ցեղասպանության վերաբերյալ «Ովքեր անմեղ են այսօր, կարող են մեղավոր դառնալ վաղը» գիրքը, միջազգային իրավունքի պրոֆեսոր Օվե Բրինգը և «Հայոց ցեղասպանությունը շվեդերի աչքերով» գրքի հեղինակ Յորան Գյունները։

Սեպտեմբերի 24-ին փառատոնի շրջանակներում տեղի ունեցավ միսիոներուհի Ալմա Յոհանսոնի վերաբերյալ շվեդ գրող և լրագրող Յաննե Կարլսոնի «Այլևս չեմ կարող. Ալման և հայերը» գրքի, ինչպես նաև Մարիա Կարլսոնի «Ժխտողականության մշակույթ. Հոլոքոստի և Հայոց ցեղասպանության ժխտման համեմատություն» մենագրության շնորհանդեսները հեղինակների մասնակցությամբ։